![](https://360.scdn8.secure.raxcdn.com/ased/sites/15/2021/07/Katie-Hall-640x396.jpg?0)
Mae Cynorthwyydd Gofal Dydd o Dregaron wedi cael ei chydnabod fel un o’r Sêr Gofal Cymdeithasol.
Enillodd Katie Hall y categori ‘Cymorth gofal cymdeithasol i oedolion’ yn rhan o wobrau Sêr Gofal 2021 gan Gofal Cymdeithasol Cymru.
Mae Katie yn Gynorthwyydd Gofal Dydd yng Nghartref Gofal Bryntirion, Tregaron, a bu’n gweithio am gyfnod yng nghartref Min y Môr yn Aberaeron y llynedd ynghanol y pandemig.
‘Peryglodd ei bywyd heb feddwl dwywaith’
“Mae Katie yn ofalwr rhagorol sy’n deall yr henoed yn reddfol ac sy’n gwybod sut i wneud iddyn nhw gredu ynddynt eu hunain a disgleirio, yn enwedig os oes ganddyn nhw ddementia,” meddai MC Lai, sef ei chydweithiwr a enwebodd hi.
“O fewn dyddiau i Covid-19 daro Min-y-Môr ym mis Rhagfyr 2020, Katie oedd yr unig aelod parhaol o staff yn y cartref gofal.
“Trefnodd Katie fod gofalwyr asiantaeth yn dod i’r cartref yn ystod yr argyfwng a gweithiodd ddydd a nos am wythnosau er mwyn sicrhau bod yr holl breswylwyr yn medru gweld wyneb cyfarwydd a chael cysur o hynny.
“Hefyd, ei llais hi oedd y llais olaf i rai o’r preswylwyr ei glywed cyn i Covid eu dwyn oddi wrthym.
“Peryglodd ei bywyd heb feddwl ddwywaith gan wneud hynny yn ystod pob eiliad o bob shifft – a dim ond 26 oed yw hi!
“Pan glywaf am arwyr tawel, rwy’n meddwl am Katie yn y dyddiau ofnadwy hynny. Rwy’n credu’n ddiffuant fod ei hagwedd anhunanol, ei phroffesiynoldeb a’i dewrder yn haeddu cael eu cydnabod.”
‘Ni allwn diolch digon’ – Cyng Catherine Hughes
“Mae Katie yn llwyr haeddu’r wobr hon, gan iddi sicrhau’r gofal gorau posibl i breswylwyr Bryntirion,” meddai’r Cynghorydd Catherine Hughes, Aelod Cabinet Cyngor Sir Ceredigion dros y Porth Gofal.
“Diolch a llongyfarchiadau, Katie. Rydym yn hynod ddiolchgar i’n staff gofal cymdeithasol ar draws ein cartrefi yng Ngheredigion.
“Mae’r cartrefi wedi wynebu heriau mawr dros y flwyddyn a hanner ddiwethaf ac mae’r staff wedi gwneud llawer mwy na’r disgwyl er mwyn mynd i’r afael â’r heriau hyn. Ni allwn diolch digon iddynt.”