Aros am Ypdêts

Athrawon ydyn ni, Enfys Hatcher (fi) ac Iwan Davies yn ysgol Henry Richard.

Yn ystod y Cyfnod Clo, rydyn ni wedi bod yn addysgu’n disgyblion ar y we gan ddefnyddio rhaglen Microsoft Teams, ac mae’r gân yn cyfleu ein rhwystredigaeth ar adegau!

Mae’r geiriau’n adrodd stori wir – eisteddais yn y car ym maes parcio’r ysgol yn aros am ypdêts ar fy laptop! Tra’n eistedd yn y car, yn aros ac aros, daeth geiriau’r gerdd i fodoli! Danfonais y geiriau at fy nghyd-athrawon, ac yn wir, drannoeth, tra’n eistedd yn ei gar ef… ym maes parcio’r ysgol… yn aros am ypdêts ar ei laptop… cyfansoddodd Iwan yr alaw i gyd-fynd â’r geiriau.

Iwan sydd hefyd yn canu i gyfeiliant ei iwceleli. Fy mab, Trefor yw prif gymeriad y ffilm, ac Iwan roddodd y cyfanwaith at ei gilydd i greu’r fideo yma i godi calonnau.

Mae cymaint wedi datgan eu bod yn uniaethu â ni a chymaint wedi teimlo fel rhoi ffling i’r gliniadur! Felly dyma gynnyrch maes parcio Ysgol Henry Richard i chi.